والحلم لسه بيبتدى من أوله ** حب وأمانى
والليل بيرسم عل ورق من فرحته ** شعر وأغانى
رسم القلم صوره الجميله عل حيطان
قام الشيطان // هد الحيطان
حرق الورق
والحلم منا بيتسرق
الحلم منا بيتسرق
******
كان حلمنا طول عمرنا ان احنا نتقابل
ونزرع الأرض الأصيله بدمنا
تطرح سنابل
نجمع قلوبنا ف الميدان
نحصد خيوط الشمس وهى طالعه عل غيطان
نقوم نصلى الفجر نشكر ربنا
قام الشيطان ** حرق الغيطان
قلبى اتحرق
والحلم منا بيتسرق
الحلم منا بيتسرق
يامصر أنتِ ف قلبنا وف دمنا
كان حلمنا إنك تكونى أمنا
وف حضنها الأم الرحيمه تلمنا وتضمنا
سرقوكى يامصر العظيمه مننا
سرقك شيطان /ملعون جبان
وكان معاه مليون حرامى وبهلوان
لعبوا ألاعيبهم ......
وبان الشر ف قلوبهم
حبسوا ولادك فى سجون الخوف والهوان
وباعوكِ وباعونا فى سوق النخاسه للرئيس
وخلوا حلمنا كوابيس ***
***
وبعد طول إنتطار
تلاتين سنه صابرين على الإهانه والدمار
ولما قرب حلمنا م الإنهيار
طلع النهار
كان يوم تلات
إتحمعوا كل الشباب
كل البنات
وقعدنا نرسم حلمنا جوه الميدان
والغدر بان
ضربوا علينا بالقنابل
هجموا علينا بالخيول
وشبابنا كان مجروح ومقتول.
واتفتحت كل العقول
ومصر قامت كلها تحمى الشباب
من كل شارع من كل حاره من كل باب
***
قال الشيطان : يا ألعبان
حاول تفرق جمعهم
حاول تشتت شملهم
وتلمهم كده كلهم
جوه السجون
افتح زنازينك ... احشد شياطينك
اضرب رصاص جوه الصدور
ماتخافش منهم دول فيران
ومسيرهم يرجعوا جوه الجحور
****
قاله ياصاحبى ماقدرتش عليهم
الخوف خلاص انتهى ....رفعوا علينا الصوت
فاتحين صدورهم علينا ... مابيخافوش الموت
حتى العيال وامهم طلعوا كمان م البيوت
والشرطه هربت وجريت زى الكلاب م الأسود
والجيش كمان كان معاهم بيحمى ثورتهم
سكت الشيطان واتخرس وجاتله حالة ذهول
والأُلعبان اتهرس تحت النعال والرجول
****
ولما نور الفجر لاح / طلع الصباح
ومصر قامت كلها شايله السلاح
ايمان برب الكون وعزه وكرامه
اخلاق من الاسلام ورقه وشهامه
مبروك علينا الوطن رجع الوطن لينا
مبروك علينا الوطن رجع الوطن بينا
__________________
ليست هناك تعليقات:
إرسال تعليق